Kürdəmir şəhəri Sadiq Əliheydərov adına 4 nömrəli tam orta məktəbin V sinif şagirdlərinə Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında növbəti açıq dərs keçirilmişdir.

Açıq dərs dahi Azərbaycan şairi və mütəfəkkiri Nizami Gəncəvinin yaradıcılığına həsr olunmuşdur. İlk olaraq filialın müdiri, filologiya üzrə fəlsəfə doktoru Yaqut Bahadurqızı dünya ədəbiyyatının qızıl dövrü hesab edilən intibah dövrü Şərq ədəbiyyatının görkəmli nümayəndəsi Nizami Gəncəvinin dünya mədəniyyəti və ədəbiyyatı xəzinəsindəki rolu və bu xəzinəyə bəxş etdiyi sənət inciləri haqqında qısa məlumat vermiş, şagirdləri dahi şairə aid olan ekspozisiya ilə tanış etmişdir.

Məktəbin dil-ədəbiyyat müəllimi Zinyət Umudova isə məktəblilərə dahi şairin zəngin irsindən bəhs etmiş və yaradıcılığının əsas xüsusiyyətlərini izah etmişdir. Şagirdlər şairin poeziyasından nümunələr söyləyərək onun yaradıcılığına olan maraqlarını nümayiş etdirmişlər.

Dərs zamanı şagirdlər şairin məşhur “Sirlər xəzinəsi” poemasından  “Kərpickəsən qocanın hekayəti”ni səhnələşdirərək təqdim etmişlər. Şagirdlər, həmçinin, böyük şairin digər əsərlərindən parçalar səsləndirmiş, Nizami yaradıcılığına dair sual-cavab bölümündə də fəal iştirak etmişlər.

Daha sonra muzey əməkdaşları şagirdlərə klassik Azərbaycan ədəbiyyatının müxtəlif dövrləri haqqında geniş məlumat vermiş, onları muzeydə qorunan eksponatlar, kitablar və tablolarla tanış etmişlər.

Qeyd edilmişdir ki, muzeydə açıq dərslərin keçirilməsi məktəblilərin ədəbiyyata marağının artırılması, keçdikləri mövzunu daha yaxşı qavramaları  baxımından mühüm əhəmiyyət daşıyır.