Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional Filialında Azərbaycanın ilk satirik, şəkilli-yumoristik dərgisi olan “Molla Nəsrəddin” jurnalının nəşr olunmasının 120 illiyi münasibətilə tədbir keçirilib. Tədbirdə muzeyin elmi işçisi Ülviyyə Yusifova “Molla Nəsrəddin ədəbi məktəbi və onun üzvləri” adlı məruzə ilə çıxış etmişdir. Məruzəçi əvvəlcə XX əsrin əvvəllərində Azərbaycanda olan mövcud vəziyyət haqqında məlumat vermiş, mətbuat azadlığının və savadsızılığın geniş yayıldığı çətin bir şəraitdə meydana gələn jurnalın dövr üçün əhəmiyyətindən bəhs etmişdir.

Daha sonra qeyd etmişdir ki, jurnalın baniləri-Cəlil Məmmədquluzadə və onun ətrafında toplaşan ziyalılar satiranı bir ədəbiyyat növündən çıxarıb, xalqın oyanış vasitəsinə çevirdilər, onların davamçıları isə bu yolu genişləndirərək Şərq dünyasında yeni bir ədəbi düşüncə formalaşdırdılar. Beləliklə “Molla Nəsrəddin” yalnız  bir jurnal deyil,  bir ideya, bir hərəkat,  bir məktəbə çevrildi. Ülviyyə xanım, jurnalın mürəkkəb və ağır şəraitdə çətinliklə ərsəyə gəldiyini vurğulamış, Cəlil Məmmədquluzadə və Ömər Faiq Nemanzadənin jurnal yaratmaq arzusundan, bu yoldakı maddi çətinliklərdən danışmışdır. Dərgi təqiblərə və ittihamlara baxmayaraq jurnal olmaqdan daha irəli gedib dövrün ən müqtədir, realist qələm sahiblərini ətrafına toplayan ədəbi məktəbə çevrilmişdir.

Məruzəçi, bu ədəbi məktəbin nasir və publisist üzvlərindən dahi bəstəkar Üzeyir Hacıbəyov, Məhəmməd Səid Ordubadi, Əbdürrəhim bəy Haqverdiyev, şairlərdən Mirzə Ələkbər Sabir, Əli Nəzmi, Əliqulu Qəmküsar, Mirzəli Möcüz və başqalarının adlarını sadalamış, onların jurnaldakı imzaları haqqında məlumat vermişdir.

Sonda Ülviyyə xanım, Molla Nəsrəddin Ədəbi Məktəbinin Azərbaycan ədəbiyyatında və mətbuatında böyük bir dönüş nöqtəsi olduğunu, bu gün də onun ideyalarının öz aktuallığını qoruduğunu söyləmişdir.