Nizami Gəncəvi adına Milli Azərbaycan Ədəbiyyatı Muzeyində “Millətin əbədi mənəviyyat məbədi” mövzusunda elmi sessiya keçirilib. Sessiyada muzeyin Xaqani Şirvani adına Aran Regional Filialının elmi işşisi Ülviyyə Yusifova “Milli ədəbi yaddaşın qorunması və regional mədəniyyətin inkişafında Aran Regional filialının rolu” adlı məruzəsi ilə çıxış edib. Məruzəçi Aran Regional Filialının fəaliyyəti, həyata keçirdiyi elmi-mədəni layihələr və muzeyin bölgənin ədəbi mədəni həyatında tutduğu mövqedən söz açıb.

Qeyd edilib ki, Azərbaycan xalqının zəngin ədəbi irsinin qorunması, öyrənilməsi və təbliği tariximizə, milli yaddaşımıza və mənəvi dəyərlərimizə xidmət edən mühüm vəzifələrdəndir. Bu məqsədlə, muzeyin filialı kimi yaradılmış və 2005-ci ildən fəaliyyət göstərən Xaqani Şirvani adına Aran Regional filialı Nizami muzeyinin elmi-maarfiləndirici missiyasını bölgədə davam etdirir. Ülviyyə xanım vurğulayıb ki, filialın fəaliyyəti Nizami muzeyinin ümumi elmi istiqamətləri, ənənələri və qarşıya qoyduğu məqsədlərlə sıx bağlıdır. Aran filialı paytaxtla region arasında ədəbi-mədəni əlaqələrin möhkəmləndirilməsinə, milli ədəbi irsimizin daha geniş auditoriyaya çatdırılmasına xidmət edir. Filial fəaliyyət göstərdiyi müddətdə muzey fondunun zənginləşməsinə mühüm töhfələr vermiş, ədəbi yubileylər, elmi-praktik konfranslar, kitab təqdimatları, görüşlər, sərgilər və maarifləndirici tədbirlər təşkil etmişdir.

Daha sonra bildirilib ki, məktəblərlə əməkdaşlıq filialın fəaliyyətində xüsusi əhəmiyyət daşıyır. Muzeydə təşkil olunan açıq dərslər, ekskursiyalar, ədəbi-bədii tədbirlər və şagirdlərin çıxışları uşaqların klassik ədəbiyyata marağını artırır, onların mütaliə vərdişlərinin və bədii-estetik zövqünün formalaşmasına kömək edir.

Sonda məruzəçi, filial müdiri, filologiya üzrə fəlsəfə doktoru, dosent Yaqut Bahadurqızının filalın fəaliyyətindəki xüsusi xidmətləri barədə söz açaraq Ədəbiyyat muzeyinin elmi və mədəni ənənələrinə söykənən Aran Regional filialının bundan sonra da milli ədəbi irsimizin qorunması, bölgə yazarlarının tanıdılması, gənclərin maarifləndirilməsi və mədəni dəyərlərimizin gələcək nəsillərə ötürülməsi istiqamətində öz fəaliyyətini uğurla davam etdirəcəyini vurğulayıb.