Ölkəmizdə məktəblilərin mütaliə marağının artırılması və klassik irsimizin təbliği məqsədilə elan olunmuş “Ədəbiyyat aylığı” çərçivəsində şagirdlərin Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialına ekskursiyası təşkil olunub. Rayon məktəblərindən ümumilikdə 85 uşaq ekskursiyada iştirak edib.

Ziyarət zamanı məktəblilər muzeyin zəngin ekspozisiyası ilə yaxından tanış olublar. Onlara Azərbaycan ədəbiyyatının görkəmli nümayəndələrinin həyat və yaradıcılığı, klassik poeziyamızın inciləri, eləcə də Aran bölgəsinin yetişdirdiyi söz-sənət xadimləri barədə ətraflı məlumat verilib. Muzeyin əməkdaşları uşaqları maraqlandıran sualları cavablandırıb, ədəbi eksponatlar, qədim əlyazmalar haqqında maraqlı faktları diqqətə çatdırıb, onları müxtəlif mədəniyyət nümunələri, rəsm və heykəltaraşlıq əsərləri ilə yaxından tanış ediblər.

Uşaqları maraqlandıran suallar muzey əməkdaşları tərəfindən cavablandırılıb.

Məktəblilər muzeyin ekspozisiya ilə ətraflı tanışlıqdan məmnun qaldıqlarını bildiriblər. Bu cür ekskursiyaların təşkili gənc nəslin dünyagörüşünün formalaşmasında, milli-mənəvi dəyərlərə və doğma ədəbiyyata sevgi ruhunda tərbiyə olunmasında mühüm rol oynayır.

Sonda məktəblilər muzeydə xatirə şəkli çəkdiriblər.

 

 Bütün hüquqlar qorunur. Xəbərlərdən istifadə edərkən www.aran.nizamimuseum.az saytına istinad zəruridir.