Azərbaycan Yazıçılar Birliyinin üzvü, şair Abduləziz Xanəhmədoğlu klassik Azərbaycan ədəbiyyatının görkəmli nümayəndəsi, şair-filosof, nasir Xaqani Şirvaninin 900 illiyinə həsr olunmuş elmi-praktik konfransda Xaqani Şirvaniyə həsr etdiyi yeni şeirini səsləndirib. Əsərdə Xaqaninin yaradıcılığı və sənətkarlıq qüdrəti yüksək poetik dillə tərənnüm olunur. Şairin 900 illik yubileyinə töhfə olan əsəri təqdim edirik.

Ə.Xəqaninin 900 illiyinə.

 

Qoca şirvanımın sənət məbədi,

Könüllər mülkündə möcüzə şair.

Doqquz əsri yola salıb yaşadın,

Adam var yetişmir bir yüzə,şair.

 

Haqqı əyənlərlə öc oldun daim,

Xalqı sevə-sevə ucaldın daim.

Böyük yaradandan güc aldın daim,

Ay eşqi,ilhamı tər-təzə şair.

 

Sevmədin Xəqanlıq,saray,səltənət,

Səni Xəqanitək tanıdı millət.

Əqidəndən dönmək bilmədin fəqət,

Verdin kimliyini biruzə,şair.

 

Elə zirvəsən ki mat qoydun məni,

Boylandım boyuna oldum yertəni.

Möhnət fırtınası apardı səni,

Vətən tanıdığın Təbrizə,şair.

 

Doqquz yüz yaşında bax bu gün də sən,

Zəka nəhəngisən,söz nəhəngisən.

Təbdə,təravətdə günəş rəngisən,

Nursan zülmətə həm gündüzə şair.

 

Dərsin səndən alıb Abduləziz,bil,

Hər şair sənintək möhtəşəm deyil.

Adın yaşayacaq hey nəsil-nəsil,

Əbədi örnəksən sən bizə şair.

 

 A.Xanəhmədoğlu

 15.06.2026.

 

© Bütün hüquqlar qorunur. Xəbərlərdən istifadə edərkən www.aran.nizamimuseum.az saytına istinad zəruridir.