Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında Azərbaycan ədəbiyyatının qüdrətli söz ustadı Əfzələddin Xaqani Şirvaninin 900 illik yubileyi münasibətilə elmi-praktik konfrans keçirilib. Konfransda muzeyin əməkdaşı , “Beynəlxalq əlaqələr və dünya muzeyləri” şöbəsinin böyük elmi işçisi, filologiya üzrə fəlsəfə doktoru Gülnar Əqiq “Xaqani yaradcılığında Şirvan mövzusu” adlı məruzə ilə çıxış edib. Azərbaycanın dünya mədəniyyətinə bəxş etdiyi nadir şəxsiyyətlərdən biri olan Xaqani Şirvaninin öz zəngin bədii yaradıcılığı ilə Yaxın və Orta Şərq xalqlarının ədəbiyyatında mühüm yer tutmasından bəhs edən məruzəçi şairin həyatı haqqında ətraflı məlumat vermişdir.

Məruzəçi şairin 51 illik “Şirvan həyatı”ndan söz açaraq bildirib ki, Xaqani həmin illərdə Şirvanın və Şirvana yaxın ölkələrin ədəbi-mədəni həyatında özünəməxsus rol oynamış, mürəkkəb yaradıcılıq yolu keçmiş, şairin bilik və bacarığına heyran qalmış Şirvanşah Manuçehr ona əmirlik rütbəsi vermişdir.

Daha sonra şairin yaradıcılığının ikinci mərhələsindən, Axistanın hakimiyyəti dövründə iki dəfə həbs olunmasından, Şirvanda artıq əmin-amanlığın, dincliyin olmaması səbəbindən şairin Şirvandan uzaqlaşması və ömrünün sonunadək Təbrizdə yaşaması haqqında məlumat vermişdir. Təbrizdə yaşadığı 24 il ərzində şair doğma yurdla əlaqəsini kəsməmiş, Şirvan ziyalıları və dövlət xadimləri ilə daim məktublaşmışdır. Qeyd edilib ki, Xaqani Şirvani yaradıcılığında daim Şirvan torpağına dərin məhəbbət bəsləmiş və doğma yurdunu əsərlərində tərif etmişdir.

Gülnar xanım şairin “Töhfətül-İraqeyn” poemasından bəhs edərək, əsərin Xaqaninin həyatı, səfərləri, xatirələri, müxtəlif məsələlər haqqında düşüncələrini əks etdirdiyini qeyd etmişdir. Əsərin “Günəşə xitab və qızılı məzəmmət” adlı fəslindən verilən nümunələrdən şairin poetik əlvanlığı, zəngin dili ilə oxucunu heyran etməsi aydın olur. “Şirvanın tərifi” adlı şeirlə bitən məruzə tədbir iştirakçılarının dərin marağına səbəb olub.