Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional Filialında şairin 900 illik yubileyinə həsr olunmuş elmi-praktik konfrans keçirilib. Konfransda muzeyin “Beynəlxalq əlaqələr və dünya muzeyləri” şöbəsinin elmi işçisi Natavan Bağırova “Əcəmin Həssanı Xaqani” adlı məruzə ilə çıxış edərək Xaqani Şirvaninin şeirlərinin rəvanlığı, səmimi ifadələri ilə Şərq poeziyasında böyük şöhrət qazanmış, “peyğəmbər şairi” Həssana bənzədilməsindən söz açıb. Qeyd edilib ki, Xaqani Şirvani əmisi Kafiəddin Ömərin onu Həssana bənzətməsini özünə böyük fəxr hesab etmişdir.

Natavan xanım çıxışında bildirib ki, sözün xaqanı, şeir mülkünün hökmdarı, alim Xaqani öz dövrünün bütün elmlərindən istifadə edərək onları yüksək poeziya incilərinə çevirib. Onun şeirləri eyni dərəcədə həm elm, həm də poeziyadır, ancaq o, hər şeydən öncə şair olduğuna görə onun elmi poeziyasına xidmət edib. Məruzəçi qeyd edib ki, Xaqani hələ sağlığında ölməz əsərləri ilə Şərqdə məşhurlaşmış, ərəb dilində yazdığı qəsidələri ona Abbasilər sarayında yüksək hörmət qazandırmışdır.

Sonda məruzəçinin Xaqani yaradıcılığından səsləndirdiyi qəsidə dərin fəlsəfi məzmunu və rəvanlığı ilə iştirakçıların diqqətinə səbəb olub.